Meðferðarúrræði fyrir þá karla sem beita heimilisofbeldi hafa gengið brösulega undanfarin ár ef marka má upplýsingar á vefsíðu Heimilisfriðar. Verkefnið var í upphafi rekið undir formerkjunum Karlar til ábyrgðar og var hrundið af stað árið 1998 til 2002 en lagðist að lokum af vegna skorts á fjárframlögum. Þó var úrræðið endurvakið af hálfu Félagsmálaráðuneytis árið 2006 og verður Heimilisfriður meðal annars til umræðu á kynningarfundi Ríkislögreglustjóra síðar í dag.
Meðferðarúrræðið var í upphafi miðað við karla eingöngu en í upplýsingatexta á vefsíðu Heimilisfriðar segir að síðar hafi orðið ljóst að öll kyn geta beitt öll kyn ofbeldi. Hjá Heimilisfriði sé því nú tekið á móti öllum sem telji sig þurfa aðstoð til að hætta að beita maka sinn ofbeldi. Þungamiðja meðferðarinnar sé að axla ábyrgð á eigin ofbeldishegðun og einnig að læra að mæta eigin reiði á uppbyggilegan og lausnarmiðaðan hátt, sér í lagi í samskiptum við maka.
„Hjá Heimilisfriði er því tekið á móti öllum þeim sem telja sig þurfa aðstoð til þess að hætta að beita maka sinn ofbeldi,“ segir enn fremur og er þar átt við endurskilgreiningu meðferðarúrræða fyrir gerendur ofbeldis. Því hafi yfirheiti úrræðis verið breytt og annað valið sem hafi breiðari skírskotun, en í dag ber meðferðarleiðin nafnið: „Heimilisfriður: meðferðar- og þekkingarstöð um ofbeldi í nánum samböndum.“
Frumkvæði gerenda er lykilforsenda meðferðarþátttöku en einstaklingar þurfa sjálfir að panta sér viðtal með þeirri undantekningu þegar barnaverndaraðilar, félagsþjónusta eða lögregla vísar málum til ráðgjafa. Þó er mökum boðið upp á tvö viðtöl við upphaf og lok meðferðar til að meta öryggi maka og barna.
Á vefsíðu Heimilisfriðar má taka sjálfspróf sem ætlað er að skera úr um hvort skapofsi og ofbeldisfull hegðun eða viðhorfsvandi og hegðun standi í vegi fyrir lífshamingju viðkomandi:
TAKTU PRÓFIÐ: Á ég við (ofbeldis) vanda að stríða?
TAKTU PRÓFIÐ: Hegðunarvandi eða viðhorfsvandi?
Úrræði og meðferðarlausnir Heimilisfriðar verða meðal efnistaka á kynningarfundi Ríkislögreglustjóra sem hefst klukkan 2 að íslenskum tíma í dag, en horfa má HÉR