Sólveig Katrín Hallgrímsdóttir sem féll í skriðu í Hvalfirði síðastliðið þriðjudagskvöld lést á gjörgæsludeild Landspítalans í Fossvogi í morgun. Sólveig var fædd 1977 og lætur eftir sig einn son.
Fjölskylda Sólveigar sendi frá sér tilkynningu um andlát Sólveigar þar sem þetta kom fram. Hún var viðskiptafræðingur frá Bifröst og mikil útivistarkona með það að markmiði að sækja heim alla fossa á Íslandi. Sólveig hafði skoðað 75 fossa þegar slysið bar að.
Fjölskylda Sólveigar Katrínar vill koma á framfæri þökkum til Landhelgisgæslunnar og hjúkrunar-, umönnunar- og sálgæslufólks sem allt lagði sig fram við ákaflega krefjandi aðstæður.
„Sólveig var hraust manneskja og með líffæragjöf mun sú hreysti hennar færa nokkrum manneskjum betra líf. Læknateymi er væntanlegt utan úr heimi í dag og einhvers staðar bíður fólk fullt nýrrar vonar um nýtt og betra líf.“
Blessuð sé minning Sólveigar Katrínar og megi fjölskylda og aðrir aðstandendur finna styrk í sorg sinni.