Glúmur Baldvinsson veltir fyrir sér í stöðuuppfærslu á Facebook hvort það hefði verið betra að fæðast ekki, því það sé slæmt að vera miðaldra kall í nútíma samfélagi. Þessa stöðuuppfærslu skrifar hann í tengslum við frétt þess efnis að miðaldra menn hafi komið Eið Smára til varnar.
„Nú er sú slæma staða komin upp í okkar nýja hugrakka samfélagi að það þykir ekki gott að vera miðaldra kall. Þegar ég var lítill stóð ég í þeirri góðu trú að verða aldrei miðaldra kall. En nú hefur sá hræðilegi atburður átt sér stað að ég er ekki bara miðaldra kall heldur síðmiðalda kall, ekki bara í seinni hálfleik heldur í framlengingu. Fergie time. Svo það tekur á. Og mér finnst það ekki mér að kenna að hafa lent í þeirri óþægilegu stöðu að flokkast undir verstu skilgreiningu á mannlegri veru í okkar samfélagi“.
Glúmur heldur áfram og lætur gamminn geisa um stöðu miðaldra karla í nútíma þjóðfélagi:
„Miðaldra kall. Staðan er þessi að þegar ég fæddist þá var ég barn og enginn tók mark á mér. Svo gerðist ég unglingur með bólur og í mútum og enginn tók mark á mér. Svo gerðist ég ungur maður og ungir menn eru alltaf ómarktækir. En svo lendi ég í þeim skelfilegu hremmingum að akkúrat þegar ég hélt að ég yrði marktækur að þá er ég strokaður út fyrir að vera miðaldra kall. Ég býð ekki í það hvað verður um mig þegar ég verð gamall kall. Verð ég þá fluttur á Þingvelli og afhausaður fyrir að hafa skoðun og það fyrir framan almúgann á sautjánda júní framtíðarinnar öllum til gleði og yndisauka? Ég er staddur hér í no win situation. Maður spyr sig hvort betur hefði verið að fæðast bara ekki. Betur setið heima en af stað farið? Smá pæling á degi sjálfstæðisins“.
Glúmi er greinilega nóg boðið og þykir ákaflega erfitt að vera miðaldra karlmaður í nútíma þjóðfélagi.