Fyrrum alþingismaðurinn Þór Saari hefur miklar áhyggjur af þróun mála í heilbrigðiskerfinu hér á landi og kennir Sjálfstæðisflokknum og VG um ástandið sem hann segir vera ömurlegt:
„Bráðamóttakan er hryggjarstykkið í spítalaþjónustunni, ekki bara hér, heldur um allan heim. Þetta mikilvæga svið er greinilega í molum hér á landi og hefur verið lengi,“ segir hann.
Lengi hefur verið fjallað um bágborið ástand bráðamóttökunnar í Reykjavík og í grein á stundin.is kemur fram að hver einasti starfandi sérfræðilæknir á bráðamóttöku, að yfirlæknum frátöldum, hafi skrifað undir bréf til forstjóra Landspítalans, Páls Matthíassonar, í byrjun maí síðastliðinn og í bréfinu var ekkert verið að skafa utan af hlutunum þar sérfræðilæknarnir sögðu meðal annars Landspítala vera „vísvitandi að setja sjúklinga og starfsfólk í hættu“.
„Undanfarin fjögur ár hefur hefur það verið í molum vegna þess að Sjálfstæðisflokkurinn vill ekki almenna ókeypis heilbrigðisþjónustu fyrir almenning og vegna þess að Vinstri-grænum, sem þó eru með heilbrigðisráðuneytið, virðist vera skítsama svo lengi sem formaður þeirra fær að vera forsætisráðherra.“
Þór segir stöðuna grafalvarlega og við hana megi ekki una:
„Þetta er ömurlegt og þessu þarf að breyta og þessu er vel hægt að breyta og við verðum að muna hverjir bera ábyrgðina“ og á þá væntanlega við ríkisstjórn Sjálfstæðisflokksins, VG og Framsóknar.
Sérfræðilæknarnir mátu ástandið á bráðamóttökunni svo að vegna stöðunnar munu „óþarfa alvarleg atvik koma upp sem geta jafnvel leitt til dauða“ – að mjög hætt sé við því að sjúklingar fái „ranga greiningu og ranga meðferð“ vegna manneklu sérfræðilækna á bráðamóttökunni og að „augljóslega sé ekki hægt að tryggja öryggi sjúklinga sem leita á bráðamóttöku“ og að sjúklingar munu verða fyrir óþarfa töf sem í sumum tilfellum getur reynst „lífshættuleg.“