Samkvæmt tilkynningu sem forsvarsmenn Ísbúðarinnar Huppu sendu fjölmiðlum í morgun, var aðalástæða þess að verið var að taka upp á svæði þar sem starfsfólk hefur fataskipti, fyrst og fremst öryggismál. Starfsfólk er margt undir lögaldri og flokkast því sem börn svo málið er alvarlegt. Persónuvernd hefur sektað fyrirtækið um fimm milljónir króna vegna athæfisins eins og fram kom hjá Mannlíf í gær, sjá hér.
Í tilkynningunni kemur fram að téð vöktun hafi verið úrræði sem beitt var vegna þess að ekki var unnt að stjórna umferð óviðkomandi aðila á svæðinu. Útidyr á starfsmannainngangi og lagernum var ekki læst öllum stundum, svo brugðið var á það ráð að vakta svæðið. Fyrirtækið segist taka niðurstöðu Persónuverndar alvarlega og þykir miður að ekki hafi verið gætt að friðhelgi starfsfólksins. Fyrirtækið biður alla þá sem málið snertir innilegrar afsökunar á yfirsjón sinni.
Fram kemur að búið sé að bregðast við niðurstöðu Persónuverndar og hafnar þær úrbætur sem krafist var af fyrirtækinu vegna málsins.