- Auglýsing -
Hljómsveitin Árstíðir hlaut nýverið verðlaun á Alþjóðlegu óháðu tónlistarverðlaununum (The Independent Music Awards) fyrir nýjustu plötu sína Nivalis.
Platan var kosin besta plata ársins í flokknum Indie/Alternative Rock, en dómnefndin var skipuð blaðamönnum, umboðsmönnum og öðru fólki úr tónlistarbransanum frá öllum heimshornum.
Að valinu kom einnig sérstök heiðursmannadómnefnd (Top Recording Talent) og í þeirri dómnefnd sátu meðal annars Tom Waits, Robert Smith (The Cure), Lee Ann Womack, Nicole Atkins, svo einhverjir séu nefndir.
Nivalis er fimmta hljóðversplata Árstíða og var gefin út síðasta sumar í samstarfi við útgáfufélagið Season of Mist. Hljómsveitin fylgdi plötunni síðan á eftir með tæplega þriggja mánaða tónleikaferðalagi. Sveitin býr sig nú undir að fara aftur í hljóðver og mun síðan fara á mánaðarlangt tónleikaferðalag í vetur.