- Auglýsing -
Í portinu að baki Brynju við Laugaveg 29 verður sannkallað jólastuð í kvöld, föstudaginn 13. desember, en þar mun fjöldi ólíkra listamanna koma fram. Herlegheitin hefjast klukkan 18.30 með ljúfum tónum úr smiðju Þóris Gunnars Geimfara, heitum drykkjum og rjúkandi súpu.
Dead Gallery klæðist sparifötunum og Prentminjasafnið mun opna í fyrsta sinn dyrnar fyrir almenningi. Klukkan 20 færist fjörið inn í Dead Gallery en þar verður sköpuð notaleg baðstofustemning; Hilmar Örn Hilmarsson allsherjargoði helgar stund og stað, Þórgnýr Inguson skáld les ljóð, Auður Jónsdóttir rithöfundur stígur á stokk, Kristín Anna Valtýsdóttir flytur hugljúfa tóna, Magnús Björn Ólafsson segir jólasögu,Teitur Magnússon spilar nokkur vel valin jólalög og er jafnframt kynnir, ritlistarmaðurinn Gunnar Jónsson les smásögur og hljómsveitin Regn leikur fyrir dansi.
Ostrur og jólasnafs verða í boði fyrir gesti. Aðgangur er ókeypis og allir eru velkomnir á meðan húsrúm leyfir.