Tónlistarmaðurinn, hárgreiðslumaðurinn, plötusnúðurinn og lífskúnstnerinn Jón Atli Helgason er margt til lista lagt en hann var ásamt danska tónlistarmanninum Kasper Bjørke, sem margir þekkja úr hljómsveitinni Filur, að senda frá sér EP-plötuna Queen of the night.
Drengirnir ganga undir nafninu Mansisters en þeir hafa þekkst lengi eða allt frá því þegar Jón Atli flutti til Danmerkur fyrir átta árum. „Ég hef spilað inn bassa við nokkur af hans eldri lögum og einnig höfum við plötusnúðast saman,“ segir Jón. „Þannig að það var rökrétt að við byggjum til einhvers konar hliðarverkefni.“
Aðspurður hverskonar tónlist þetta sé svarar hann einfaldlega: „Þetta er danstónlist sem er oftast skilgreind sem „indie dance“ eða „leftfiled house“ hvað sem það nú þýðir. Eitthvað svona til að dilla sér við.“
Nóg er fram undan hjá köppunum en Jón Atli og Kasper ætla að halda áfram að gefa út sína eigin tónlist sem og tónlist eftir aðra listamenn hjá hfn music, sem er útgáfufyrirtæki þeirra félaga í Hamborg. Einnig ætlar sveitin að koma fram á nokkrum vel völdum tónleikum, þó svo að Jón Atli vilji ekki kalla þá tónleika.
„Nei, ég myndi ekki kalla þetta tónleika þar sem við spilum ekki lifandi tónlist, heldur erum að dj-a. En jú það eru nokkur klúbba og „festivala“ gigg í deiglunni.“