Tónlistarmaðurinn Gísli Kristjánsson, a.k.a. Gísli, hefur sent frá sér nýja plötu, Skeleton Crew.
Gísli sér sjálfur um allar upptökur og hljóðblöndun á plötunni, sem hægt er að lýsa sem samblöndu af rokki og gáfumannapoppi, og spilar á nánast öll hljóðfæri fyrir utan aðstoð sem hann fær frá konu sinni, Elízu Newman sem spilar á fiðlur og bakraddir. Þá leikur fimm ára dóttir Elízu og Gísla á ýmis slagverkshljóðfæri og Birkir Örn Gíslason rífur í eitt gitarsóló. Þar sem lágmarks mannskapur kemur að gerð plötunnar fannst Gísla viðeigandi að kalla hana The Skeleton Crew.
Gísli vakti mikla athygli fyrir fimmtán árum þegar hann gaf út plötuna How About That hjá útgáfurisanum EMI UK við mikið lof gagnrýnenda. Titillag plötunnar How about that naut vinsælda á útvarpsstöðvum um alla Evrópu og Bandaríkin og var Gísla meðal annars hampað fyrir undarlega textagerð. Eftir þriggja ára tónleikaferðalag var stefnan tekin á Los Angeles þar sem Gísli hljóðritaði aðra plötu sína með upptökustjóranum Mickey Petralia sem þá hafði gert plötur með Eels, Peches, Dandy Warhols og Beck og fleiri stórstjörnum.
Eftir tímann í Los Angeles flutti Gísli til London og sneri sér að upptökustjórnun og lagasmíðum fyrir aðra og vann meðal annars með Duffy, Mick Jones (The Clash) og margverðlaunaða lagahöfundinum Cathy Dennis. Eftir sex ár í London flutti Gísli í Hafnir á Reykjanesi ásamt Elízu konu sinni og byggði sér stúdíó þar sem hann hefur unnið með ýmsu íslensku tónlistarfólki.
Þó að Gísli hafi um tíma sagt skilið við sólóferilinn hefur hann haldið áfram að gefa út lög við og við, eins og Going On (2014) og Paper Bag (2016), sem hafa notið vinsælda á Íslandi, þó að fólk hafi kannski ekki áttað sig á því hver maðurinn á bakvið þau væri. Þá voru nokkur lög eftir Gísla gefin út á sameiginlegri plötu hans og norska listamannsins William Hut í fyrra, af norska plötufyrirtækinu Appollon Records. Þeir sem hafa hlýtt á nýju plötuna segir að undarlegu textarnir séu enn til staðar, en hljóðheimurinn og útsetningarnar hafi þróast mikið á þeim fimmtán árum frá því að plata hans How About That kom út. Það er því spurning hvort kalla eigi þessa nýju plötu Gísla endurkomu eða nýja byrjun.
Hægt er að hlusta á Skeleton Crew á öllum helstu streymisveitum og á Albumm.is.