K.óla, a.k.a Kata Jóhannesdóttir, gaf nýverið út myndband við nýjasta lag sitt, Plastprinsessan. Hún hefur eftirfarandi að segja um útgáfuna: „Mikilvægt er að hugsa um hvað við skiljum eftir okkur, hvort sem það er plastslóð eða góð minning sem vekur upp bros. Það er mjög auðvelt á þessum tímum að leyfa vonleysinu að kæfa sig í plastpökkuðu paradísinni sem við fæðumst inn í; í heimi þar sem samfélagsmiðlar með filteruðum raunveruleika gera okkur meira einmana og fjarlæg hvort öðru. Það er ekki ákvörðun neins að fæðast en við tökum óteljandi ákvarðanir á hverjum degi um hvernig við högum okkur í þessum heimi. Það er mikilvægt að hugsa um hvað við skiljum eftir okkur.“
Það eru þær Kata og Arína Vala Þórðardóttir sem stóðu að gerð myndbandsins, en Ása Bríet Brattaberg hannaði kjólinn.
Þess má geta að Plastprinsessan verður hluti af plötu K.óla sem er væntanleg á næsta ári. Áætlað er að platan komi út á 12 tommu vínyl ásamt eldri plötu K.óla, Allt verður alltílæ.