Karl Orgeltríó og Rakel Sigurðardóttur hafa sent frá sér popplag sem kallast What Can You Do To Me? og myndband við lagið.
Rakel er ung og upprennandi söngkona sem vinnur nú einnig að eigin efni, en Karl Orgeltríó var stofnað árið 2013 í kringum Hammondorgelið Nínu sem Karl Olgeirsson leikur á. Fyrir þremur árum sendi tríóið frá sér plötuna Happy Hour með Ragga Bjarna sem reyndist vera síðasta platan sem sá mæti söngvari gerði. Í kjölfarið fylgdu stórtónleikar í Háskólabíói sem voru teknir upp og sýndir í Sjónvarpi Símans.
Með útgáfu What Can You Do To Me? hefur tríóið heldur betur vent sínu kvæði í kross því hér er á ferð svalt popplag í anda trip hop-tónlistar sem var allsráðandi um síðustu aldamót. Þess má geta að gerð myndbandsins var í höndum Ástu Jónínu Arnardóttur og Haraldar Arnar Óskarssonar.