Tónlistarmaðurinn Hlynur Ben sendi nýverið frá sér lagið Þú þekkir þennan mann. Lagið er það fyrsta sem við fáum að heyra af þriðju breiðskífu hans, II Úlfar, sem er væntanleg þann 30. ágúst.
Hlynur segir að II Úlfar verði örlítið afturhvarf til unglingsáranna, þegar rokkið átti hug hans allan.
„Já, þetta er eiginlega platan sem mig dreymdi um að búa til þegar ég var 17 ára gamall. Nú, 20 árum síðar, hef ég loksins öðlast næga reynslu til að klára hana og langar því að gefa sjálfum mér plötuna í 37 ára afmælisgjöf.“
Hann hefur marga fjöruna sopið í tónlistinni og meðal annars spilað með hljómsveitum eins og Gleðisveit Ingólfs, Rufuz, Mono og Búálfunum. En þekktastur er hann þó sem skemmtikraftur og trúbador.
Síðasta plata Hlyns, Leiðin heim, kom út árið 2014 og gerði góða lukku. Ekki síst lögin Hrópum, Vaknaðu, Það er allt í lagi og Kaldur bæði og sár, sem hljómuðu mikið á öldum ljósvakans.
Aðspurður um nýja lagið segir Hlynur: „Það er hrátt, hávært, dónalegt og algjörlega ólíkt öllu sem ég hef gefið út áður. Þetta tóndæmi er ekkert endilega lýsandi fyrir plötuna í heild sinni en er skemmtilegur vinkill á mun flóknara verki sem heildin er. Umfjöllunarefnið er einstaklingur sem er illa innréttaður og vissara að vara sig á. Við þekkjum öll svona mann. Reynum að vera ekki eins og hann.“