Þrítugur maður nefbraut Ásbjörn Ásbjörnsson fyrir snjóboltakast í Breiðholti en Morgunblaðið greindi frá málinu árið 1983.
„Ég var á leið heim úr leikfimi ásamt vini mínum þegar kallinn réðist á mig. Við fórum upp í Straumnes og keyptum okkur kók og héldum síðan áleiðis heim í Klapparberg. Við námum staðar á lóð skólasystur okkar og vorum að tala saman þegar frændi minn kom. Hann var með snjóbolta og henti í glugga. Ég sá að maður stóð upp í stofunni og þá benti frændi minn á mig. Ég var ekkert hrifinn af þessu tiltæki frænda mins og skammaði hann, en þá henti hann aftur snjóbolta í gluggann og hljóp í burtu. Þá sá ég að kallinn kom hlaupandi og varð mjög hræddur og lagði á flótta, eins og ég sagði áðan. Þegar kallinn hafði kýlt mig og sparkað í mig fór hann leiðar sinnar. Það fossblæddi úr nefinu og einnig blæddi úr siðunni. Ég fór út í sundlaug til þess að fá blóðnasirnar stöðvaðar. Þar var ég lagður í hvíldarherbergi og hringt var á lögreglu og sjúkrabíl og farið með mig í sjúkrahús. Mér er svolítið illt í andlitinu núna og þeir á sjúkrahúsinu sögðu að ég ætti að koma í aðgerð á miðvikudag í næstu viku,“ sagði Ásbjörn við Morgunblaðið um málið en hann var aðeins 12 ára gamall þegar árásin átti sér stað.
Maðurinn sagði við Morgunblaðið að þrír drengir hefðu verið að kasta snjótboltanum í glugga hjá sér og hann hafi ítrekað beðið þá um að hætta en það hafi ekki tekst. Hann hafi því reiðst og náði Ásbirni á hlaupum og slegið hann.