Maður sem kallaður var grasníðingur í DV svaraði fyrir ásakanir í blaðinu árið 2004.
Forsaga málsins er að DV fjallaði um að grasníðingur hafi „brennt“ nafnið Jóna í brekku við Miklubraut í Reykjavík. Hinn meinti grasníðingur sendi DV leiðréttingu um málið og lét vita að hann væri að tala um Jón Ásgeir.
Hægt er að lesa bréfið hér fyrir neðan:
„Elsku hjartans kæru vinir. Ég er „grasníðingur“ sá sem „brenndi“ Jón Á í vannærða brekku við Miklubraut. Ef bændur landsins lesa þessa frétt um grasbrennsluna við Miklubraut hljóta þeir að leggja af þá „grasníðslu“ að bera áburð á tún sín. Borgaryfirvöld eru að mínu áliti sek um það „Níðingsverk“ að svelta með skipulögðum hætti grasfleti borgarinnar til að spara slátt. Afþvíleiðir að margar þeirra eru rytjulegar og ljótar. „Grasbrennsla“ mín er því fyrst og fremst mótmæli gegn vannæringu borgarinnar. Svo var Jón Ásgeir mikið umræddur í vor og mér fannst gott að minnast hans með því að lífga smá gróður með nafni hans „Jón Á“ og fara svolítið í taugarnar á sjálfstæðismönnum í leiðinni.“
Undir þetta ritaði svo N.N en samkvæmt sérfræðingi DV sem greindi handskrifað bréfið með þessari yfirlýsingu var sennilega um menntamann að ræða. Rithöndin þótti gamaldags og innihélt bréfið orðaval einstaklings sem hefur hlotið menntun. Að sögn DV bar leit að níðingnum engan árangur.