Rithöfundurinn Einar Kárason kærði einn frægasta þjálfara Íslands árið 1993.
Árið 1993 greindi DV frá því að Einar Kárason, rithöfundur, hafi kært Guðjón Þórðarson, þjálfara ÍA. Ástæða kærunnar var sú að Guðjón beit hann Einar í slagsmálum sem áttu sér stað á lokahófi knattspyrnumanna en það fór fram á Hótel Íslandi. Einar var ræðumaður kvöldsins og á Guðjóni að hafa sárnað að ekkert skuli hafa verið minnst á hans lið en ÍA varð Íslandsmeistari árið 1993 undir stjórn Guðjóns.
Þegar Guðjón var spurður út í málið af blaðamanni DV sagði hann: „Ég vil ósköp lítið um þetta segja. Það er eitthvað sem átti sér stað sem ég geri mér ekki alveg grein fyrir hvað var en það verður ábyggilega skoðað þegar ég kem heim,“ en Guðjón var staddur í Hollandi þegar blaðamaður DV talaði við hann. Einar vildi ekki tjá sig um málið.
Árið 1994 greindi DV frá því að Guðjón hafi fallist á að greiða Einari á annað hundrað þúsund krónur fyrir bitið.
Baksýnisspegill þessi birtist fyrst 24. október 2023