Gunnar Gunnarsson, bílasali í Bílfangi, var alls ekki hrifinn af bifreiðum forsetaembættisins árið 2004.
Árið 2004 voru sænsku konungshjónin í heimsókn á landinu og voru tveir bílar frá forsetaembættinu notaðir til koma þeim og dóttur þeirra milli staða. Annar þeirra var Benz frá 1994 en hinn Cadillac frá 1990. Gunnar Gunnarsson, bílasali, var ekkert sérstaklega hrifinn af bílunum.
„Þetta eru druslur miðað við þá bíla sem eru á götunni í dag,“ sagði Gunnar Gunnarsson í samtali við DV um málið. „Ég gæti trúað að hægt væri að selja Bensinn á 1,8 milljónir væri hann staðgreiddur. Gallinn við þessa týpu er að boddíið er misheppnað, allt of þunglamalegt og fyrir bragðið varð bíllinn aldrei vinsæll. En þetta er langur bíll með stórar hurðir og hann myndi vafalaust njóta þess í verði að vera fyrrverandi forsetabíll. Þeir eru yfirleitt minna keyrðir og betur bónaðir en aðrir,“ en Gunnari þótti meira til ameríska bílsins koma.
„Cadillacinn er að verða safngripur og þessir bílar verða einfaldlega betri með aldrinum. Það er svo gott í þessu. Það mætti vel fá 1,1 milljón fyrir þennan bíl og það væru góð kaup,“ sagði Gunnar að lokum.