Sá leiðinlegi atburður varð í byrjun október 1975 að háhyrningur sem hafði verið veiddur til þess að nýta á sædýrasafni, drukknaði í höfninni í Vestmannaeyjum.
Lóðsbátur hugðist sigla úr höfninni í Vestmannaeyjum í októberbyrjun 1975 en varð fyrir því óláni að flækjast í kaðli sem hélt háhyrningi sem tveir franskir háhyrningsveiðarar höfðu veitt kvöldið áður en við það dróst hann niður og drukknaði.
Í fyrirsögn við frétt Dagblaðsins frá 6. október 1975 er fullyrt að háhyrningurinn hafi verið metinn á átta milljónir króna og í framhaldsúttekt á málinu segir að tilgangurinn með veiðunum á honum hefði verið að flytja hann á sædýrasafn. Í fyrri frétt Dagblaðsins um málið tjáir skipverji lóðsbátsins, Angantýr Elíasson, sig um slysið en sagði hann alls ekki um gáleysi skipverja um að kenna hvernig fór fyrir háhyrningnum:
ÁTTA MILLJÓN KRÓNA HÁHYRNINGUR DREPST:
„ÞETTA VAR EKKI GÁLEYSI“
– þeir gerðu enga athugasemd í Rauðseynni þótt kaðallinn vœri losaður, segja lóðsmenn
„Kaðallinn var ekki losaður af gáleysi, heldur töldum við það óhætt. Það myndi ekki skaða háhyrninginn,” sagði Angantýr Elíasson. Hann var skipverji á Lóðsbátnum í Vestmannaeyjum í gærmorgun þegar umræddur kaðall var losaður, en sem kunnugt er drapst háhyrningurinn, sem Rauðsey AK kom með til Vestmannaeyja. Háhyrningurinn var í nót, sem komið var á milli tveggja bryggja og lokaði höfninni að hluta. Sagði Angantýr að Lóðsinn hefði verið þarna fyrir innan og þurft að komast út. Ekki hefði verið tilkynnt að þarna hefði verið lokað fyrir og hefðu bátar sem þarna komu að í myrkri hæglega geta siglt á kaðlana og slitið þá eða jafnvel fengið þá í skrúfuna. Þetta væri algjörlega ólöglegt. Hann sagði að skipverjar á Rauðseynni hefðu horft á þegar Lóðsinn losaði kaðalinn og hefðu þeir ekki gert neina athugasemd þar við. Kaðallinn hefði verið losaður augnablik, í mesta lagi í 1-2 mínútur og síðan bundinn aftur. ,,Ég get ekki dæmt um hvort háhyrningurinn drapst út af þessu,” sagði Angantýr og hann bætti við að greinagóður gamall sjómaður hefði álitið háhyrninginn dauðan áður en þetta gerðist. Frakkinn sem er hér á landi í því augnamiði að ná háhyrningi kom að þegar allt var um garð gengið og gat því ekki tjáð sig um málið.
Á öðrum stað í sama blaði er rætt við Frakkann sem veiddi háhyrninginn en hann tjáði blaðamanni að hann og annar Frakki sem hjálpaði við veiðarnar, hefðu verið of úrvinda eftir veiðarnar að þeir hafi ákveðið að fresta því til morguns að koma upp þró í kringum háhyrninginn. Hafi þeir því fest hann þess í stað í köðlum báts á útleið og drukknað. Sagðist hann þó bjartsýnn á að hann næði öðrum háhyrningi áður en langt um liði. Hér má lesa frásögnina:
Enn drepst háhyrningur:
FYRIR HANDVÖMM VAR ÁTTA MILLJÓN KRÓNA SAFNGRIP DREKKT í VESTMANNAEYJUM
Frakkarnir tveir sem verið hafa hér á landi að undanförnu við háhyrningsveiðar voru heldur uppgefnir þegar þeir stigu út úr flugvélinni frá Vestmannaeyjum í gærdag. Þeir Grandiere og Garcia kváðust ekki mundu gefast upp, heldur halda þeir á báti sínum Sigurvon til Hafnar í Hornafirði í lok vikunnar og halda þar ótrauðir áfram háhyrningsleitinni. Grandiere harmaði atburðinn sem átti sér stað í gærmorgun þegar háhyrningur sem þeir höfðu komið með inn í höfnina í Vestmannaeyjum drapst í nót í höfninni. Kenndi hann því um að þeir hefðu komið með háhyrninginn inn í höfnina seint um kvöldið og verið of útkeyrðir eftir það til að útbúa í kringum hann þró og frestað því til næsta morguns. En frestunin hefði valdið því, að þegar vinna átti að þróargerðinni strax um morguninn var það um seinan. Fyrir mistök flæktist bátur á útleið í köðlunum sem héldu háhyrningnum, dróst hann niður og drukknaði. Grandiere var nokkuð viss um, að honum myndi takast að ná í háhyrning fljótlega, það væri ekki erfiðast að finna háhyrningana heldur það að koma þeim heilu og höldnu til hafnar og geta geymt þá þar. Hafa þeir komið sér upp fullkominni aðstöðu í Höfn i Hornafirði. Háhyrningar elta síldina og í september og október er síldin og háhyrningarnir nógu nærri landinu til að gjörningur sé að veiða þá og koma heilu og höldnu til hafnar. Þó svo að Grandiere verði tilkynnt um háhyrning einhvers staðar á landinu, þá skiptir það mestu hvar hann er og hve lengi verið er að koma honum til Hafnar í Hornafirði þar sem aðstaðan til að geyma háhyrninginn er fyrir hendi.