Kaupmaðurinn Ármann Eyjólfsson var á gangi eitt laugardagskvöld í miðborg Reykjavíkur þegar hann mætti íslenskum karlmanni sem fór á harðaspretti framhjá honum. Stuttu síðar kom amerískur hermaður á hlaupum eftir sömu götu. Virðist sem hermaðurinn hafi talið að Ármann væri sá sem hann væri að elta og barði hann til óbóta, áður en hann flúði af vettvangi. Mánuðurinn var september, árið 1943.
Sagt var frá líkamsárás amerísks hermanns í blöðum á borð við Þjóðviljann og Alþýðublaðið en svo virtist sem kaninn hafi talið hið blásaklausa fórnarlamb, kaupmanninn Ármann Eyjólfsson, vera þann Íslending sem hermaðurinn hafi lent í orðaskiptum við á veitingastaðnum Foldin á Skólavörðustíg. Ekki fannst frétt um eftirmála árásarinnar við gerð Baksýnisspegilsins en þó kom fram að Ármann hafi slasast nokkuð í árásinni en hann var barinn nokkrum sinnum í andlitið, og að auglýst hafi verið eftir vitnum.
Hér má sjá umfjöllun Þjóðviljans um málið:
Íslendingur barinn af hermanni
Á laugardagskvöldið var varð Ármann Eyjólfsson kaupm. fyrir árás amerísks hermanns og hlaut nokkur meiðsl. Hann var staddur á Njarðargötunni þegar hann mætti íslendingi á hlaupum, en rétt á eftir sá hann amerískan hermann koma út úr veitingastofunni „Foldin“’ og hljóp hann rakleitt að Ármanni og sló hann í götuna, svo að hann hlaut nokkur meiðsl og hljóp síðan burtu. Íslendingurinn og hermaðurinn höfðu lent í deilu inni á Foldinni, en komið var í veg fyrir að þeir færu í handalögmál. Íslendingurinn fór síðan út og hermaðurinn á eftir honum og er sennilegt að hann hafi álitið Ármann vera mann þann, sem hann lenti í deilu við. Rannsóknarlögreglan biður þá sem voru áhorfendur að þessu, eða geta gefið einhverjar upplýsingar þessu viðvíkjandi að tala við hana sem fyrst.