Hjalti Hjaltason var ósáttur út í Reykjavíkurborg árið 2004.
„Fólk vill ekki bara pylsur. Það vill eitthvað meira og það get ég ekki boðið upp á nema fá að stækka vagninn. Og það stendur í borgaryfirvöldum,“ sagði Hjalti Hjaltason pylsusali við DV á sínum tíma en hann átti pylsuvagn við Vesturbæjarlaugina. Hann lokaði vagninum árið 2000 en hann vildi fá að stækka vagninn en það gekk illa að fá leyfi til þess.
„Vagninn er 18 fermetrar en ég vil stækka hann upp í 65 fermetra. Nú loksins eftir mikið þref hef ég fengið leyfi til að stækka hann í 27 fermetra eða eins og stærðin er í pylsusölunni við Laugardalslaugina. Gallinn er bara sá að það er miklu fleira fólk í Laugardalnum en Vesturbænum,“ en Hjalti hafði selt pylsur í 20 ár þegar hann ákvað að loka.
„Þetta er búið að vera skelfilegt. Eiginlega martröð sem lýsir sér í því að í borgarkerfinu virðist enginn geta tekið ákvörðun af viti og einn vísar á annan. Það má vera að pylsuvagninn sé á vitlausum stað en hitt er víst að ég er að verða vitlaus á þessu öllu.“
Í frétt DV er sagt frá að líkamsræktarstöð muni opna á næstunni við Vesturbæjarlaugina en að ekki sé gert ráð fyrir veitingasölu þar á bæ því að treyst sé á að Hjalti myndi opna aftur.