Tveimur samkynhneigðum mönnum var vísað upp úr Bláa lóninu árið 2005.
„Við viljum að fólki líði vel hér en það má ekki særa velsæmiskennd annarra gesta,“ sagði Grímur Sæmundsen, framkvæmdastjóri Bláa lónsins, í samtali við DV árið 2005 en þá voru tveir karlmenn, annar þekktur athafnamaður á Suðurnesjum, gripnir við að stunda kynlíf í lóninu. Grímur sagði að slíkt væri hreinlega ekki í boði.
„Bláa lónið er staður þar sem pör eiga að njóta slökunar en það verður að haga sér eins og annars staðar á opinberum stöðum. Þegar þessi tilvik koma upp tökum við mjög hart á og gerum þá ekki greinarmun á Jóni og séra Jóni,“ sagði framkvæmdastjórinn en tók fram að flestir gestir lónsins sýndu góða hegðun.
Þá kom einnig fram í viðtalinu að helsta verkefni lónsins á þeim tíma var að koma vörum sem voru í boði í Bláa lóninu til sölu á Norðurlöndum og Englandi en Grímur er einmitt menntaður læknir og var mikið með puttana í því verkefni „Ég hef ekki læknað mann í fimmtán ár í þeim skilningi,“ sagði hann og að sæi ekki eftir neinu. „Menn verða að velja og ég valdi Bláa lónið eins og svo margir.“