Jón lögmaður dæmdur fyrir óspektir í héraðsdómi – Braut blað í dómsögu Íslands

Lögmaðurinn Jón Egilsson braut blað í dómsögu Íslands árið 2004 þegar hann var fyrsti lögmaðurinn til að vera dæmdur fyrir óspektir í dómsal í opinberu sakamáli.

DV fjallaði um málið á sínum tíma en Jón var að verja Jakob Pálsson sem hafði verið kærður fyrir fólskulega líkamsárás árið 2002. Við aðalmeðferð málsins á Jón að hafa gripið fram í fyrir vitnum, fulltrúa lögreglunnar í Reykjavík og gert Ingveldi Einarsdóttur, dómara málsins, upp skoðanir ásamt því að trufla lögmann lögreglustjóraembættisins við yfirheyrslu. Að mati Ingveldar gekk Jón svo langt að hún dæmdi Jón fyrir óspektir en var honum gert að borga 40 þúsund króna sekt fyrir hegðun sína.

Í frétt DV er einnig sagt frá því að Jón hafi sjálfur gerst brotlegur við lög á sínum yngri árum en hann var dæmdur fyrir að berja leigubílstjóra með glasi á leið heim af skemmtistað.

Jakob Pálsson var dæmdur í fimm mánaða skilorðsbundið fangelsi en maðurinn sem hann réðst á hlaut sex sentimetra langan skurð á ennið og rifbeinsbrotnaði.