Nektardans var sýndur á bingókvöldi í Verzlunarskóla Íslands árið 1998 en DV greindi frá.
„Þetta gekk út yfir öll velsæmismörk. Kvöldið var auglýst sem venjulegt bingókvöld og því voru margir nemendur með yngri systkini sín með sér eins og oft á svona kvöldum. Það var fristælkeppni í hléinu en síðan komu tvær nektardansmeyjar fram á sviðið. Önnur þeirra hafði í frammi mjög dónalega tilburði á sviðinu og gekk eins langt og hægt er að ganga. Þetta var allrosalegt og gekk allt of langt,“ sagði nemandi í Verzlunarskóla Íslands við DV um málið.
Samkvæmt DV var um bingókvöld, sem var skipulagt af nemendafélaginu og íþróttaráði, að ræða. Dansmeyjarnar höfðu ekki verið auglýstar sem hluti af dagskrá kvöldsins og kom dansinn því nemendum á óvart. Í fréttinni er greint sérstaklega frá því að dansmeyjarnar hafi báðir verið erlendar.
Börn á staðnum
„Mörgum krökkunum fannst þetta atriði nektardansmeyjanna fyndið i fyrstu en þetta gekk úr hófi. Margir voru frekar hneykslaðir, sérstaklega af þvi að börn voru þarna líka,“ sagði annar nemandi um atvikið.
Þorvarður Elíasson, þáverandi skólastjóri Verzlunarskóla Íslands, hafði ekki heyrt af þessu þegar DV ræddi við hann um bingókvöldið. „Ég mun að sjálfsögðu kanna það rækilega og ræða við þá sem báru ábyrgð á skemmtuninni. Ef nemendur hafa ekki áttað sig á því að það er varhugavert að fá svona dansmeyjar á skemmtun í skólanum þá mun ég vekja athygli þeirra á því. Það er aldrei að vita upp á hverju svona stúlkur taka. Varla hafa þeir sem fengu þær áttað sig á því að þær myndu sýna dónaleg tilþrif.“