Ráðist var á nemanda Fjölbrautarskólans í Garðabæ árið 2005.
„Læknirinn segir að ég sé búinn að missa einhverja heyrn á öðru eyra. Ég á víst að vera marinn inni á hausnum. Svo er ég slasaður á öxl,“ sagði Gunnar Örn Heiðdal í viðtali við DV árið 2005. Gunnar var fyrir utan FG þegar hann var sleginn í hnakkann með skóflu af ókunnugum manni en sá var ekki nemandi í skólanum. Fjöldi vitni sá árásina. „Ég hef aldrei talað við þennan mann. Þetta var einstaklega skrítið. Ég hné niður og rankaði svo við mér. Ég leit á vin minn sem sagði við mig, er allt í lagi með þig? Ég spurði bara: Hvað gerðist?“ sagði Gunnar.
Lítið var vitað um árásarmanninn nema að hann væri 17 ára, úr Reykjavík og kom til að hitta vin sinn sem var nemandi FG. Enginn hafði skýringu á árásinni. „Þetta virðist alveg tilefnislaust. Við þurfum að fá þennan árásarmann í hús,“ sagði Gunnar Hilmarsson, varðstjóri í Hafnarfirði, um málið
Þorsteinn Þorsteinsson, skólastjóri FG, kenndi fíkniefnum um árásina.
„Strákurinn sem lendir í þessu botnar ekki neitt í neinu. Sá sem ræðst á hann er sennilega einhver dópsalinn í Reykjavík. Það þarf ekki nema að ganga niður Laugaveginn til að sjá fólk í annarlegu ástandi. Maður þarf ekki að vera hissa á því að það komi svona tilefnislaus og glórulaus tilfelli þegar fíkniefni flæða um allt,“ sagði skólastjórinn. „Í hvert skipti sem eitthvað svona hefur komið upp í bænum hvetjum við fólk til að kæra svona mál. Svo þekki ég mörg dæmi þess að fólk þori ekki að kæra.“
Aðspurður sagðist Gunnar ætla kæra árásina.