Ung stelpa átti ekki góðan dag í Húsdýragarðinum árið 1991.
Fjallað var um málið í DV á sínum tíma en í umfjöllun blaðsins er sagt frá því að hundur í eigu starfsmanns Húsdýragarðsins hafi bitið 9 ára stelpu í vörina en hún var með vinkonu sinni og móður hennar í garðinum. Gengu þær að hundinum, sem var að naga bein, og klöppuðu honum. Ákvað þá hundurinn að bíta aðra stelpuna og þurfti að flytja hana á Borgarspítalann og sauma sex spor í vör hennar.
„Ég veit ekki betur en að hundurinn verði hér áfram. Atvikið átti sér stað eftir lokun og það var búið að opna hliðið inn á svæðið þar sem hundurinn var. Hann var með bein þegar stelpurnar komu til hans og rauk þá upp og glefsaði til annarrar þeirra,“ sagði Sigurjón Bláfeld hjá Húsdýragarðinum um málið í samtali við DV. Þá sagði hann bitið yrði skoðað í samráði við Hundaræktarfélagið.
„Það verður náttúrulega talað við hundasálfræðing út af þessu,“ sagði Sigurjón og var stelpunni boðið að koma í garðinn í viku til að hjálpa til og kynnast dýrunum í von um að bæta henni þessa slæmu upplifun að einhverju leyti.