Reykvískur veitingamaður keypti stóran skammt af Viagra árið 2004.
Stinningarlyfið Viagra hefur í fjölda ára glatt ansi marga en lyfið hefur lengi verið það mest selda í heiminum. Árið 2004 var aðeins hægt að fá 50 til 100 mg skammta á Íslandi. Þar sáu bandarískir hermenn sér leik á borði og byrjuðu að selja 200 mg skammta á svörtum markaði. Hermennirnir gátu auðveldlega pantað stóra skammta í gegnum bandaríska lækna og fengið sent til landsins. Íslenskur veitingamaður sá eftir kaupunum en DV fjallaði um málið.
„Þessir skammtar eru ekki fyrir menn heldur hesta,“ sagði veitingamaðurinn í miðbæ Reykjavíkur en hann hafði sjálfur keypt einn skammt. „Ég náði vart andanum og var um tíma hræddur um að kafna.“.
„Þetta er lífshættulegur leikur og það skelfir mann að heyra þetta,“ sagði Bryndís Birgisdóttir, lyfjafræðingur, í samtali við DV. „Það er ákveðinn hópur manna sem má alls ekki taka Viagra og enginn ætti að taka það inn nema ráðfæra sig við lækni fyrst.“
„Við höfum aldrei heyrt af þessu,“ sagði Friðþór Eydal, upplýsingafulltrúi bandaríska hersins á Miðnesheiði.