Dagný Hafsteinsdóttir var heldur betur svekkt með leigubílstjóra sem ók í veg fyrir hana árið 1997 en DV fjallaði um málið á sínum tíma.
Forsaga málsins var að Dagný var aka bíl sínum á Vatnsendavegi við BSÍ þegar leigubílstjóri ók í veg fyrir hana. Dagný slapp sem betur fer ómeidd og sömu sögu er að segja um vinkonu Dagnýjar sem var með henni í bílnum. Samkvæmt frétt DV skemmdist bíll Dagnýjar töluvert en frambretti og annað framljósið brotnuðu og ýmsar aðrar skemmdir urðu á bílnum.
„Ég ætlaði að kalla á lögreglu en hún sagði mér að hafa engar áhyggjur því hún mundi bara borga tjónið. Hún skrifaði nafn og símanúmer og sagði mér að hafa samband við sig heim en ekki á bílastöðina því hún væri í fríi næstu daga. Ég og vinkona mín vorum í vafa hvað við ættum að gera en þar sem við erum óvanar svona aðstæðum þá ákváðum við að treysta konunni, sérstaklega af því hún var leigubílstjóri. Síðan kom í ljós að þetta símanúmer er ekki til og hún laug til nafns. Það er aðeins ein önnur kona í þjóðskrá með þessu nafni og ég hef gengið úr skugga um að það er ekki hún. Mér finnst það agalegt að leigubílstjóri skuli gera svona. Þetta var steingrár bíll með venjulegu gulu taxamerki á þakinu,“ sagði Dagný sem sat uppi með tjónið en ætlaði að reyna finna bílstjórann.
„Það voru vitni að þessu atviki. Það var par aftur í leigubílnum og svo voru tveir strákar þarna á silfurgrárri Toyota Corolla. Ég vona að þetta fólk gefi sig fram og hjálpi mér í þessu máli. Ég læt svona atvik mér að kenningu verða og ljóst að það er engum að treysta,“ sagði hún við DV en blaðið kom svo með framhaldsfrétt daginn eftir þar sem greint var frá því að bílstjórinn hafi fundist.
Hvetur fólk til að treysta ekki öðru fólki
„Forsvarsmenn leigubílastöðvarinnar voru okkur afskaplega hjálplegir og vildu gera allt til að finna bílinn og ökumanninn. Við fórum yfir möppu með öllum leigubílstjórum og bílum. Eftir töluverða leit bar ég kennsl á bílinn. Við fórum og skoðuðum hann og það var beygla aftan á honum sem passaði alveg við áreksturinn. Síðan fundum við út hver konan er þannig að búið er að finna sökudólginn. Ég hef lagt fram kæru hjá lögreglunni vegna þessa máls. Mér finnst þetta afskaplega óheiðarlegt hjá konunni aö ljúga svona til nafns og símanúmers eftir að hafa valdið þessu tjóni. Ég var voðalega græn að láta hana plata mig svona og ég vil beina þeim tilmælum til fólks að það passi sig ef það lendir í því sama og ég lenti í. Það borgar sig greinilega ekki að treysta náunganum of vel,“ en samkvæmt upplýsingum sem DV hafði konan sem ók leigubílnum unnið sem slíkur í 28 daga þegar atvikið átti sér stað en hún hafði afleysingum fyrir annan bílstjóra.
Samkvæmt hinni ónefndu leigubílastöð var konunni meinað að starfa fyrir stöðina eftir þetta atvik.