Algjörir vitleysingar voru að leika sér með skotvopn árið 1996.
„Jóni varð litið út um gluggann þegar hann vaknaði á þriðjudagsmorgun. Þá sá hann einhverjar einkennilegar skemmdir á rúðunni. Svo kom í ljós að einhver hafði verið að skjóta með haglabyssu á svefnstað okkar hjónanna,“ sagði Steinunn Pálsdóttir, matráðskona í brúarvinnuflokki sem var við störf í Rangárvallasýslu, við DV árið 1996 en Jón Valmundsson brúarsmiður og eiginmaður Steinunnar stýrir flokknum.
Lögreglan í Rangárvallasýslu sá um rannsókn málsins en þrjú skotgöt fundust á ytra gleri á svefnskúr flokksins og högl í veggnum við gluggann en enginn var í skúrnum þegar skotið var á hann vegna þess að starfsmenn voru í fríi. Að sögn DV var málið óupplýst en kenningar voru uppi um að þarna hafi verið óvandaðir skotveiðimenn að skjóta á endur en skúrinn var við Affallsbrú á þjóðvegi eitt.
„Þetta er háalvarlegt ef það er fretað svona í átt að mannabústöðum. Þó að við höfum líklega flest verið í fríi þá hefði samt einhver getað verið þarna við vinnu yfir helgina. Þegar menn eru í einhverju svona verða þeir að minnsta kosti að tékka á því hvort einhver er nærri,“ segir Steinunn.