„Ég vaknaði við það að tveir menn réðust á mig í rúminu og gengu í skrokk á mér. Ég náði að komast fram úr og hafa annan þeirra undir en fékk þá hinn á bakið á mér,“ sagði Hlynur Jónsson á Ólafsfirði við DV árið 1996 en þá réðust þrír menn inn til hans meðan hann svaf. Einn þeirra tók tvær barnapíur og átta mánaða gamalt barn Hlyns í gíslingu í öðru herbergi meðan hinir tveir réðust á Hlyn.
Forsaga málsins er Hlynur hafði rifist við einn mannanna á skemmtistað fyrr um kvöldið en að sögn Hlyns var það ekki alvarlegt. „Ég náði einhvern veginn að komast fram en man ekki í smáatriðum hvenig málin þróuðust, ég varð ofsalega hræddur,“ sagði Hlynur en honum tókst að sækja hníf inn í eldhúsið og skar einn árásarmannanna. Þá lögðu tveir þeirra á flótta og veitti Hlynur þeim eftirför. Þriðji maðurinn kom svo í bakið á honum og sló Hlyn meðvitundarlausan. Mennirnir gengu þá í skrokk á Hlyni, drógu hann aftur upp í rúm og skildu hann þar eftir í blóði sínu.
„Ég er þokkalega á mig kominn miðað við það sem gerðist, óbrotinn en marinn og aumur um allan líkamann,“ sagði Hlynur.
Samkvæmt DV voru árásarmennirnir heimamenn á Ólafsfirði og síbrotamenn. Þá hafi verið mikill ótti meðal bæjarbúa vegna mannanna en þeir voru 20-24 ára gamlir þegar árásin átti sér stað.