Um tíu prósent Íslendinga, eða um 35.000 manns, nota ekki öryggisbelti. Þetta kemur fram á vef Samgöngustofu en nýverið hófst sérstök herferð Samgöngustofu í samvinnu við auglýsingastofuna Pipar-TBWA sem ætlað er að hvetja til notkunar öryggisbelta. Herferðin ber heitið 2 sekúndur og vísar það til þess tíma sem tekur að spenna á sig öryggisbeltið.
8 sinnum meiri hætta á banaslysi
Þeir ökumenn sem taka áhættuna og nota ekki öryggisbelti eru sagðir vera í átta sinnum meiri hættu á að lenda í banaslysi en þeir sem nota öryggisbelti. Er sú tala fengin með samanburði á beltanotkunartíðni annars vegar og tíðni beltanotkunar þeirra sem látast í umferðarslysum hins vegar. „Í rannsóknum á banaslysum þar sem fólk hefur ekki notað belti hefur komið í ljós að í langflestum tilfellum hefði viðkomandi bjargast hefði hann notað beltin,“ segir í tilkynningu Samgöngustofu.
Frakkar og Þjóðverjar fremstir
Í umferðaröryggisskýrslu International Transport Forum fyrir árið 2019 kemur fram að notkun öryggisbelta er mest í Frakklandi eða um 99% og það sama á við í Þýskalandi. Þar er notkun öryggisbelta við akstur á hraðbrautum 100% en 99% annars.
Hvar skyldum við vera á þessum lista? Íslendingar eru í 17. sæti og verður það að teljast fremur lélegt. Með því að spara ekki þessar 2 sekúndur getur þjóðin komist ofar á listanum og jafnframt fækkað banaslysum í umferðinni.