Fimmtán bækur eru tilnefndar til Barnabókaverðlauna Reykjavíkurborgar í ár en verðlaunin eru veitt í þremur flokkum: flokki barna- og ungmennabóka frumsaminna á íslensku, flokki þýddra barna- og ungmennabóka og flokki myndríkra bóka. Athöfnin fór fram í dagí nýju rými fyrir ungmenni í Borgarbókasafninu í Gerðubergi, Okinu.
Við athöfnina flutti Skúli Helgason, formaður skóla og frístundaráðs, ávarp og dómnefnd kynnti tilnefndar bækur og rökstuðning fyrir valinu. Verðlaunin verða svo afhent hefðinni samkvæmt síðasta vetrardag í Höfða, 22. apríl.
Eftirtaldir rithöfundar, myndhöfundar og þýðendur eru tilnefndir til Barnabókaverðlauna Reykjavíkurborgar 2020 fyrir eftirtaldar bækur, sem allar komu út á síðasta ári.
Barnabækur frumsamdar á íslensku:
Gunnar Helgason: Draumaþjófurinn. Mál og menning gaf út.
Margrét Tryggvadóttir: Kjarval: málarinn sem fór sínar eigin leiðir. Iðunn gaf út.
Hildur Knútsdóttir Nornin. JPV gaf út.
Ragnhildur Hólmgeirsdóttir: Villueyjar. Björt gaf út.
Snæbjörn Arngrímsson: Rannsóknin á leyndardómum eyðihússins. Vaka-Helgafell gaf út.
Myndlýsingar í barnabókum:
Bergrún Íris Sævarsdóttir: Ró – fjölskyldubók um frið og ró. Töfraland gaf út.
Blær Guðmundsdóttir: Sipp, Sippsippanipp og Sippsippanippsúrumsipp: systurnar sem ætluðu sko ekki að giftast prinsum! Bókabeitan gaf út.
Jón Páll Halldórsson: Vargöld, 2. bók. Iðunn gaf út.
Lani Yamamoto: Egill spámaður. Angústúra gaf út.
Rán Flygenring: Vigdís: bókin um fyrsta konuforsetann. Angústúra gaf út.
Þýddar barnabækur:
Illugi Jökulsson: Bók um tré eftir Piotr Socha og Wojciech Grajkowski. Sögur útgáfa gaf út.
Jón St. Kristánsson: Villinorn: Bækurnar Blóð Viridíönu og Hefnd Kímeru eftir Lene Kaaberbøl. Angústúra gaf út.
Silja Aðalsteinsdóttir: Snjósystirin eftir Maju Lunde. Mál og menning gaf út.
Þórarinn Eldjárn: Hver vill hugga krílið? eftir Tove Jansson. Mál og menning gaf út.
Þórdís Gísladóttir: Múmínálfarnir: Minningar múmínpabba eftir Tove Jansson. Mál og menning gaf út.
Barnabókaverðlaun Reykjavíkurborgar eiga sér lengsta sögu barnabókaverðlauna á landinu og er helsta markmið þeirra að vekja athygli á því sem vel er gert í bókaútgáfu fyrir unga lesendur svo og að hvetja þá til bóklesturs.
Dómnefnd verðlaunanna í ár er skipuð Tinnu Ásgeirsdóttur formanni, Ásmundi Kristberg Örnólfssyni, Helgu Birgisdóttur, Karli Jóhanni Jónssyni og Valgerði Sigurðardóttur.
Rökstuðning dómnefndar á vali bókanna fimmtán má lesa hér.