Í fjárlagafrumvarpi næsta árs eru 220 milljónir króna merktar Ljósinu sem til þessa hefur verið rekið fyrir söfnunarfé og styrki frá ári til árs.
Svandís Svavarsdóttir heilbrigðisráðherra hefur ákveðið að fela Sjúkratryggingum Íslands að gera þriggja ára þjónustusamning við Ljósið um endurhæfingarþjónustu við fólk sem greinst hefur með krabbamein.
Ljósið var formlega stofnað árið 2006. Markmið þess frá upphafi hefur verið að sinna endurhæfingu og veita stuðning þeim sem greinst hafa með krabbamein og aðstandendum þeirra. Ljósið er viðurkennd heilbrigðisstofnun samkvæmt skilgreiningu laga og heyrir undir eftirlit Embættis landlæknis.
Þjónusta Ljóssins er þverfagleg og einstaklingsmiðuð og felst m.a. í iðjuþjálfun, sjúkraþjálfun, sálfræðiþjónustu, næringarráðgjöf og félagslegri virkni. Fjármögnun Ljóssins hefur hingað til byggst á styrkframlagi frá Vinnumálastofnun og heilbrigðisráðuneytinu til eins árs í senn og söfnunarfé eins og áður segir.
Samkvæmt ákvörðun heilbrigðisráðherra verður Sjúkratryggingum Íslands falið að gera þjónustusamning við Ljósið til þriggja ára, frá og með árinu 2020.
Sjá einnig: Eliza hélt einlæga ræðu
Sjá einnig: „Ég veit ekki hvernig þetta hefði farið ef ég hefði beðið“