Söngvarinn Aaron Ísak Berry hefur verið sakfelldur í Héraðsdómi Reykjavíkur fyrir kynferðisbrot gegn þremur 12 ára drengjum auk þess að hafa í fórum sínum barnaníðsefni. Þrátt fyrir sakfellingu er það ákvörðun dómara að gera Aaroni Ísak ekki refsingu þar sem talið er að refsing verði ekki til bóta vegna andlegs ástands hans. Er honum þess í stað gert skylt að sæta eftirliti geðlæknis og meðferðum hjá sálfræðingum.
Í frétt DV segir að Aaroni Ísak hafi verið gefið að sök að hafa átt í óviðeigandi og klámfengnum rafrænum samskiptum við drengina auk þess að hafa gert tilraunir til að fá þá til að hafa samræði við sig. Káfaði hann meðal annars á drengjunum í klofi auk þess að kyssa þá tungukossum.
Dómari taldi refsingu ekki til bóta
Í texta dómsins er að finna mjög ógeðfelldar lýsingar á athæfi og tali Aarons Ísaks. Kemur meðal annars fram að hann vildi fá drengina til að sleikja á sér rassinn og notaði þar orðalagið „rimma“ en drengirnir vissu ekki hvað hann átti við. Einnig sendi hann þeim myndir af afturenda sínum og getnaðarlim sínum. Reyndi hann að fá drengina til að senda sér nektarmyndir gegn greiðslu. Einnig sendi hann andlitsmynd af sér þar sem hann var útataður í sæði. Kemur einnig fram að Aaron gaf drengjunum tölvuleikjaáskriftir fyrir tugi þúsunda í því skyni að mýkja þá og gera meðfærilegri.
Það var niðurstaða sérfræðinga sem rannsökuðu Aaron Ísak vegna málsins að hann væri sakhæfur en refsing væri ekki líkleg til að bera árangur vegna ástands hans.
Er það niðurstaða dómsins að Aaroni Ísak verði ekki gerð refsing vegna glæpa hans en honum verði skylt að hlýta eftirliti yfirlæknis réttargeðdeildar Landspítalans á Kleppi og meðferðar sálfræðinga.
Ennfremur var Aaron Ísak dæmdur til að greiða einum drengnum sem hann braut gegn 1 milljón króna í miskabætur, öðrum 600 þúsund krónur og þeim þriðja 500 þúsund krónur.
Vakti mikla athygli sem söngvari
Aaron Ísak er fæddur árið 1998 og verður 24 ára síðar á þessu ári. Hann vakti mikla athygli fyrir þátttöku sína í forkeppni Eurovision-söngvakeppninnar árið 2020 en þar keppti hann undir listamannsnafninu Kid Isak. Árið 2019 bar hann sigur úr býtum í Söngkeppni framhaldsskólanna er hann flutti lag hljómsveitarinnar Queen, Love of My Life.
Árangur Aarons Ísaks í tónlist vakti áhuga barna á honum og kemur fram í dómnum að drengirnir voru upp með sér yfir þeirri athygli sem hann sýndi þeim. Brotin gegn drengjunum stóðu yfir frá hausti 2019 og fram á vorið 2020, en Aaron Ísak var þá 21 árs á meðan þolendur hans voru aðeins 12 ára.
Í dómnum kemur fram að Aaron Ísak upplifir sig yngri en hann er og á meðan hann framdi brotin hafi hann talið sig vera í einhvers konar ástarsamböndum við drengina og ekki séð neitt rangt við framferði sitt. Hann hafi síðan séð eftir á að hann hafi gert rangt.
Töluvert á eftir í þroska og greindur með ýmsar raskanir
Aaron Ísak viðurkennir að líklega hefði hann haldið áfram að brjóta af sér ef hann hefði ekki verið stöðvaður. Lögregla var kölluð til vegna framferðis hans og var hann tekinn í yfirheyrslu. Eftir yfirheyrslu fór hann í skóla tveggja drengja sem hann hafði brotið gegn, nálgaðist þá þar og sakaði þá um að ljúga á sig. Var hann í kjölfar þess settur í nálgunarbann á drengina.
Í dómnum kemur fram að Aaron Ísak er öryrki og býr hjá móður sinni sem veitir honum mikinn stuðning. Í niðurstöðu sálfræðimats kemur fram að hann er með sögu um einhverfu og kvíðaröskum frá barnæsku. Hann er með átröskun og er talinn tornæmur. Ekki er hægt að finna merki um siðblindu eða barnagirnd hjá honum þrátt fyrir þessi brot sem hafa sannast á hann. Jafnframt á Aaron Ísak sögu um þunglyndi.
Talið er að Aaron Ísak sé töluvert á eftir í þroska og því sé þroskamunur á honum og þolendum hans minni en aldursmunur þeirra en þeir voru 12 ára þegar hann braut á þeim og hann var 21 árs.