Kolbrún Bergþórsdóttir, blaðamaður á Fréttblaðinu, er líklega meðal heitustu stuðningsmanna bresku krúnunnar. Sumir hafa því velt fyrir sér afstöðu hennar til viðtals sjónvarpskonunnar Ophrah Winfrey við Harry Bretaprins og eiginkonu hans Meghan Markle. Viðtalið er talið enn eitt reiðarslagið fyrir konungssinna sem hafa varla jafnað sig eftir barnaníðshneyksli Andrew prins. Nú er fjölskyldan öll sökuð um rasisma.
Kollegar Kolbrúnar á Fréttablaðinu ræða viðtalið á Twitter. S. Mikael Jónsson, fyrrverandi samstarfsmaður Kolbrúnar, kallar eftir viðbrögðum hennar. Aðalheiður Ámundadóttir bregst við því kalli og birtir skjáskot af SMS-samskiptum hennar við Kolbrúnu. Þar spyr Aðalheiður: „Ég er að horfa á viðtalið en er ekki mjög vel inn í þessu. Hvorri á maður að standa með; Meghan eða drottningunni?“
Því svarar Kolbrún: „Við stöndum með drottningunni sem talar ekki um tilfinningar sínar. Hún hefur örugglega oft viljað drepa sig en bítur samt á jaxlinn. Annað en þessi unga kynslóð sem þarf alltaf að gaspra um tilfinningar sínar!“