Vestmanneyingar eiga um sárt að binda þessa dagana eftir að áföllin hafa dunið yfir og góðir menn fallið frá með skömmu millibili. Á aðeins einni viku hafa tvö áföll riðið yfir.
María Sæmundsdóttir þurfti meðal annars að kveðja tengdaföður sinn, Pál Árnason, á Gamlársnótt. Í fyrradag fannst svo Ingimar Ágúst Guðmarsson, fæddur 1980, látinn í Vestmannaeyjahöfn rétt eftir hádegi. Hann lætur eftir sig eiginkonu og tvö börn. Ingimar var tengdasonur Ásmundar Friðrikssonar, þingmanns Sjálfstæðisflokksins.
Páll, eða Palli múrari eins og hann var gjarnan kallaður, var faðir annars tengdasonar Ásmundar. Hann var jafnframt tengdafaðir Maríu sem minnist hans með fallegum orðum í færslu á Facebook en Páll glímdi við hinn erfiða sjúkdóm Parkinson síðastliðna tvo áratugi.
Hvíldu í friði elsku Palli.
„Elsku tengdapabbi kvaddi þennan heim í fyrrinótt eftir langa baráttu við parkinson. Það sem hann var alltaf ljúfur og geðgóður þrátt fyrir sjúkdóminn. Við áttum oft góðar stundir og náðum vel saman ég og hann. Hann elskaði að vera í kringum afastrákana sína, spila með þeim á píanóið og tefla. Það er ómetanlegt að hafa notið þessara góðu stunda með honum,“ segir María og bætir við:
„Við viljum þakka fyrir fallegar kveðjur frá ykkur kæra fjölskylda og vinir vegna fráfalls hans. Hann hefur verið ótrúleg hetja á þessum 23 árum sem hann hefur verið með sjúkdóminn. Við fjölskyldan munum sakna hans sárt en erum þó ánægð hann sé hættur að þjást. Hvíldu í friði elsku Palli.“