„Ef menn vilja gagnrýna eitthvað þá ættu þeir að horfa á verðið sem ríkið seldi á,“ sagði Jakob Valgeir Flosason í samtali við Fréttablaðið. Jakob er einn fagfjárfestanna sem tóku þátt í útboðinu á Íslandsbanka en hafa nokkrir af fjárfestunum lýst yfir óánægju sinni með að listinn hafi verið gerður opinber. Jakob sagði afsláttinn sem ríkið gaf hafa verið mjög mikinn.
„Að mínu mati hefði ríkið átt að selja til fárra en öflugra kjölfestufjárfesta, eins og talað var um í upphafi. Það var ekki gert. Í staðinn voru það aðallega lífeyrissjóðirnir sem pressuðu verðið niður í þessar 117 krónur á hlut. Ég veit það fyrir víst að ríkið hefði getað selt á genginu 122 ef þeir hefðu einbeitt sér að þeim sem voru tilbúnir til að borga meira. Það er það sem mér finnst alvarlegt í þessu.“
Taldi Jakob að þjóðin hafi fengið meira fyrir sinn snúð, hafi nokkrir öflugir fjárfestar komið inn. Þannig hafi þeir getað gætt hagsmuna sinna og hagsmuna bankans.