Þórólfur Guðnason sóttvarnarlæknir segir það vera áhyggjuefni hversu illa fólk virti tveggja metra regluna í röðum fyrir utan sundlaugar þegar þær voru opnaðar á miðnætti í gær. Þetta sagði hann á upplýsngarfundi almannavarna nú síðdegis.
Steinþór Einarsson frá íþrótta- og tómstundaráði Reykjavíkurborgar var gestur fundarins. Hann tók undir með Þórólfi og sagði unga fólkið, sem var í meirihluta við opnun, hafa gleymt að hugsa um tveggja metra regluna. Hann sagði margt fólk hafa verið upptekið af því að horfa á símann sinn og þannig ekki veitt merkingum athygli.
Hann segir opnun sundlauganna annars hafa gengið vel. Hann segir það hafa heppnast vel að opna á miðnætti og þannig hafi ekki myndast of mikil umferð gesta núna í morgunsárið. Hann segir greinilegt að opnun sundlauga er kærkomin fyrir marga fastagesti.
Spurður út í hvort gripið hafi verið til einhverra ráðstafana þegar var ljóst að fólk var ekki að virða tveggja metra regluna sagði Steinþór að starfsfólk sundlauganna hafi geta nýtt kallkerfi til að minna á regluna. Hann sagði að starfsfólk sundlauganna þyrfti samt að geta treyst sundlaugargestum til að taka tillit til annarra gesta.