Ákváðu að hlaupa í staðinn fyrir að borga reikninginn

Starfsfólk á veitingahúsi í miðbæ Reykjavíkur óskaði eftir aðstoð lögreglu í gær klukkan 18:05 vegna pars sem stakk af án þess að greiða fyrir veitingar sem það hafði pantað.

Fólkið hljóp í burtu án þess að greiða reikninginn. Lögregla hafði uppi á parinu en fólkið gaf þá skýringu að þau höfðu ætlað að greiða fyrir veitingarnar þegar þau áttuðu sig á því að hvorugt var með peninga eða greiðslukort. Þá brugðu þau á það ráð að hlaupa út.

Þetta kemur í fram í dagbók lögreglu þar sem farið er yfir verkefni gærkvöldsins og næturinnar.