Alvarlegt bílslys í Breiðholti í nótt

Lögreglu barst tilkynning um alvarlegt umferðarslys seint í gærkvöldi. Slysið átti sér stað í Breiðholti þar sem tvær bifreiðar skullu saman en lögreglu var gert viðvart klukkan 23:32. Lögregla þurfti aðstoð slökkviliðs til þess að ná öðrum ökumanninum út úr bifreið sinni en báðar bifreiðarnar skemmdust talsvert.

Þá telur lögregla sig vita hvernig slysið kom til en málið er í rannsókn. Ekki kemur fram hvort ökumenn eða farþegar hafi slasast alvarlega en alls voru fjórir aðilar í bifreiðunum. Þá liggur ekki fyrir hvort ökumenn hafi verið undir áhrifum áfengis eða vímuefna þegar slysið átti sér stað.