Í gærkvöld greindi Mannlíf frá því að ríkislögreglustjóri hefði getað vikið lögreglumanni, sem var kærður fyrir barnaníð, tímabundið frá störfum að mati nefndar um eftirlit með lögreglu, en þetta kom fram í kvöldfréttum RÚV í gær. Halldóra Baldursdóttir, móðir stúlku sem kærði manninn, vill afsögn Haralds Johannessen ríkislögreglustjóra vegna málsins. Samhliða því rifjaði Mannlíf upp ýmsa þætti í málinu. Embætti ríkislögreglustjóra gerir athugasemdir við fréttaflutning Mannlífs.
Embætti ríkislögreglustjóra hefur sent ritstjórn Mannlífs neðangreindar athugasemdir.
„Vegna umfjöllunar Mannlífs vil embætti ríkislögreglustjóra koma eftirfarandi á framfæri:
1. Embætti ríkislögreglustjóra hafði ekki aðkomu að rannsókn sakamálsins.
2. Nefnd um eftirlit með lögreglu telur ekki ástæðu til að senda tilmæli um aðgerðir.
3. Lögreglumaðurinn hefði komið aftur til starfa.
4. Ríkislögreglustjóri fór að lögum í þessu máli.
Embætti ríkislögreglustjóra hefur verulegar athugasemdir við fréttaflutning Mannlífs vegna málsins
Nefnd um eftirlit með lögreglu telur ekki ástæðu til að senda ríkislögreglustjóra tilmæli um aðgerðir vegna málsins né telur ástæðu til frekari athafna af hálfu nefndarinnar, sbr. ákvörðun nefndarinnar frá 3. þ.m.
Í umfjöllun er látið að því liggja að embætti ríkislögreglustjóra hafi haft aðkomu að rannsókn sakamálsins svo er ekki. Þá hafði ríkissaksóknari ekki talið efni til að ákæra lögreglumanninn og tekið ákvörðun um að fella málin niður á grundvelli 145. gr. sakamálalaga.
Hefði lögreglumaðurinn verið leystur frá embætti um stundarsakir á meðan málið var til rannsóknar hjá lögreglu þá hefði hann komið aftur til starfa hjá lögreglustjóranum á höfuðborgarsvæðinu þar sem mál á hendur honum voru felld niður. Fjölmörg dæmi eru um slíkt, ýmist vegna gruns um brot embættismanns í starfi eða utan þess. Lögreglumanninum hefði því ekki verið veitt lausn frá embætti að fullu.
Ríkislögreglustjóri fór að lögum í þessu máli.
Er þess óskað af ofangreint verði birt á www.man.is“