„Við stöndum reglulega frammi fyrir þeirri áskorun þar sem við þurfum að meta hvort rétt sé að viðhalda íhaldssemi eða horfa með frálslyndari augum á hina ýmsu samfélagshætti,’’ skrifar Áslaug Arna Sigurbjörnsdóttir í færslu á Facebook síðu sinni í gær.
Þar rifjar Áslaug upp gamla ræðu sem hún hélt á Kirkjuþingi fyrir tveimur árum síðan. Hún segir þá ekki alltaf hægt að sjá fyrir hvort rétt sé að viðhalda íhaldssemi og halda í gamlar venjur eða siði.
Oft þurfi að hafa opinn hug fyrir þróun í samfélaginu, nær og fjær.
Færslu Áslaugar má lesa í heild sinni hér að neðan:
„Tíminn líður hratt og oft er gott að rifja upp hvað hefur á daga manns drifið eins og þessi tveggja ára gamla ræða á Kirkjuþingi:
„Hákoni varð helst að falli, að hlýddi hann eigi tímans kalli.“
Þannig orti Grímur Thomsen um fall Hákonar Hlaðajarls. Kall tímans árið 995 var kristin trú. „Nýr siður“ sem boðaður var af Ólafi konungi Tryggvasyni.
Við stöndum reglulega frammi fyrir þeirri áskorun þar sem við þurfum að meta hvort rétt sé að viðhalda íhaldssemi eða horfa með frálslyndari augum á hina ýmsu samfélagshætti. Það er ekki alltaf hægt að sjá það fyrir hvorn veginn skal fara í því samhengi; stundum er ekki bara ágætt heldur nauðsynlegt að halda í gamlar venjur, siði og reglufestu – en oft þurfum við að horfa með opnum hug til þeirrar þróunar sem er að eiga sér stað í samfélaginu, bæði nær og fjær.“