Björn Leifsson, eigandi World Class, lét tilfinningarnar hlaupa með sig í gönur fyrr í vikunni og svaraði athugasemdum netverja á vef Vísis. Í athugasemdum sínum gaf hann upp persónuupplýsingar viðskiptarvinar síns.
Í athugasemdum ræddu nokkrir netverjar um að áfram þyrftu þeir að greiða fyrir áskrift sína hjá World Class þrátt fyrir að stöðvar World Class væru lokaðar vegna kórónuveirufaraldursins. Í opinberum svörum sínum ljóstraði Björn því upp hvort viðkomandi væri með kort hjá World Class eða ekki og hvað viðkomandi væri að greiða.
Einn netverji benti Birni á að það sem hann væri að gera, að birta upplýsingar um viðskipti fólks við fyrirtækið á opinberum vettvangi, væri ólöglegt. Athugasemdum Björns hefur nú verið eytt.
Í frétt Vísis um málið segir að Persónuvernd hafi borist ábending um málið. Þar segir að Helga Þórisdóttir, forstjóri Persónuverndar, hafi staðfest að málið hafi verið tilkynnt til Persónuverndar og vísaði hún svo á upplýsingar á vef Persónuverndar um reglur um meðhöndlun persónuupplýsinga.