Afmælisbarn þessa mánudags er hinn hressi tónlistarmaður, áhugaleikari og hlaðvarpsstjarna, Baldur Rangarsson. Eru nú liðin heil 38 ár frá fæðingu hans.
Þingeyingurinn Baldur Ragrnarsson er eitt stórt hæfileikabúnt. Er hann hvað þekktastur fyrir gítarleik og söng í þungarokksbandinu Skálmöld og sem einn af fjölmönnum meðlimum Ljótu hálfvitanna en einnig hefur hann getið sér gott orð sem annar tveggja hlaðvarpsþáttastjórnendanna í Draugar fortíðar. Og ef það er ekki nóg, þá hefur hann einnig ferðast víða um land með meðleikurum sínum í Leikhópnum Lotta og skemmt æskunni. Þó að Skálmöld og Ljótu hálfvitarnir séu þekktustu hljómsveitirnar sem Baldur er í, hefur hann einnig leikið með miklum fjölda sveita af hinu ýmu tagi. Ber helst að nefna Innvortis, Morðingjana, Bófar og Dætrasynir en með þeim spilar Baldur á nánast hvaða hljóðfæri sem er.
Mannlíf heyrði í Baldri og vildi fá að vita hvort og þá hvernig hann hyggðist halda upp á afmælisdaginn.
„Ég ætla að fara og sjá Aldous Harding spila í Hljómahöllinni í kvöld. Það verður dásamlegt.“
Öfundin er mikil hjá Mannlífi enda um frábæran listamann að ræða. En hvað er svo framundan hjá Baldri?
„Svo taka við á næstunni frekari hlaðvarps- og tónlistarsmíðar í húsnæði sem ég á eftir að finna, það er klárlega alveg næst á dagskrá. Allt of mikið af glórulausum hlaðvarpshugmyndum sem ég þarf að koma í framkvæmd.“
Það er nefnilega það! En tónlistarsmíðar fyrir hvaða hljómsveitir?
„Bara hinu og þessu, Skálmöld, Hálfvitum, mikið fyrir Drauga fortíðar og svo liggur slatti af lögum í sarpinum sem þarf kannski að koma í einhvern farveg.“
Mannlíf óskar Baldri innilega til hamingju með afmælið og vonar að hann skemmti sér vel í kvöld.