Neytandi vikunnar er Baldvin Arnar Samúelsson, stjórnarformaður, einn eigenda Tryggja ehf., golfari og laxveiðimaður.
Hve miklu eyðir fjölskyldan í mat og aðrar rekstrarvörur heimilisins á mánuði og hvar verslar hún helst?
Ég hugsa að við séum að eyða svona 150 þúsund mánaðarlega og af stórum hluta virðast stærstu útgjaldaliðirnir vera bleyjur og skvísur fyrir yngsta fjölskyldumeðliminn. Við verslum helst í Krónunni og Bónus; konan kýs að gera innkaupin í Bónus en mér finnst betra að versla í Krónunni vegna þess hve verslanir Krónunnar eru þægilega upp settar.
Hvað með sparnað í matarinnkaupum og hverju vilt þú breyta sem neytandi?
Ég kýs almennt ekki að spara í matarinnkaupunum. Það er ekki þar með sagt að ég vilji heldur bruðla en ég vil kaupa góða matvöru. Helstu breytingarnar sem ég vil sjá í matvöruverslunum snúa að ávöxtunum. Ef maður gæti undantekningalaust keypt ferska ávexti þá myndi maður klárlega velja þá umfram óhollari valkosti sem millimál.
Leggur þú fyrir, og hvaða leiðir notar þú ef svo er?
Ég spara svo sannarlega og geri það helst með tvennum hætti. Annarsvegar nota ég sparnaðarreikning sem er laus til raðstöfunnar til að mæta óvæntum útgjöldum en þegar ég lít til sparnaðar til lengri tíma fjárfesti ég í hlutabréfum.
Telur þú álagningu verslana sanngjarna og gerir þú verðsamanburð á vörum og þjónustu?
Líti maður á efnahagsreikninga Festis og Haga gefur það vísbendingu um að verðlag matvörubúða sé hátt. Það er vart við öðru af búast af fyrirtækjum sem rekin eru með arðssemisstefnu, þ.e.a.s. rekstur þeirra snýst að lokum um að skapa hagnað fyrir hluthafa þeirra.
Verðtryggð lán, óverðtryggð lán eða engin lán?
Enginn ætti að vera með neyslulán, byrjum þar. Þegar kemur að húsnæðislánum er skynsamlegast að taka óverðtryggð lán að því gefnu að viðkomandi hafi í raun efni á því en að öðrum kosti er hægt að fara blönduðu leiðina eða taka lán tengt vísitölu. Fólk þarf þá að gera sér grein fyrir því að það er að greiða höfuðstólinn margfalt til baka. Þegar upp er staðið þarf þetta bara að passa í veskið. Ef fólk hefur fjármagn til er auðvitað hyggilegt að sleppa húsnæðislánum alfarið.
Umhverfisvernd, skiptir hún þig máli?
Já, í einu orði sagt. Í þeim fyrirtækjum hvar ég sit í stjórn er það eitt af okkar hjartans málum að nýta hvert tækifæri til þess að nýta græna orkugjafa, takmarka pappírinn í umhverfinu og kolefnisjafna. Við gætum þess að öll orka sem félögin nota sé upprunnavottuð.
Það er mjög áríðandi að fyrirtæki og einstaklingar nýti náttúruauðlindir með skynsamlegum hætti. Við fáum tímann okkar hér á jörð lánaðan og það er okkar að skila plánetunni okkar í eins góðu ástandi og hægt er þegar við yfirgefum hana. Við þurfum að hugsa um þær kynslóðir sem koma á eftir okkur. Síðast þegar ég vissi var engin önnur leið í boði ef illa tekst til međ þessi heimkynni.
Hvaða mál og málaflokka telur þú að þurfi að leggja meiri áherslu á?
Í fyrsta lagi ættum við að leggja mun meiri áherslu á að hjálpa eldri borgurum og öryrkjum að komast frá því að vera þiggjendur og í átt að því að verða neytendur. Þetta gerum við með því að auka ráðstöfunartekjur þeirra. Með aukinni þáttöku þeirra í hagkerfinu verða að lokum til auknar tekjur fyrir Ríkissjóð því meiri neysla kallar á aukinn fjölda starfa.
Það þarf einnig að einblína meira á nýsköpun í verslun og þjónustu. Regluverkið þarf að vera þannig úr garði gert að nýsöpun sé gert hærra undir höfði en ríki og sveitarfélög ættu að koma sterkari þar inn en verið hefur.
Ég t.d. er mikill talsmađur fyrir nýsköpun í mat og drykk; vil geta verslað beint frá býli eđa pantað frá einhverjum af þeim fjölmörgu craft brugghúsum án þess ađ regluverkið sé að þvælast fyrir.
Það er í senn atvinnuskapandi og myndi auðvelda fólkinu með hugmyndirnar að koma nýrri vöru og þjónustu á markað.
Annað sem þú vilt taka fram?
Verð ég ekki að nota tækifærið og benda fólki á að versla við Tryggja?