„Við komumst að góðu samkomulagi við Baltasar og það er allt í góðu á milli aðilanna. Við áttum góð samskipti og ekkert meira um það að segja,“ segir Þórhallur Gunnarsson, framkvæmdastjóri Miðla, sem heldur utan um Stöð 2, um endurgreiðslu Baltasars Kormáks kvikmyndaleikstjóra til fyrirtækisins vegna framleiðslu á sjónvarpsþáttaröðinni Kötlu. Í upphafi greiddi sjónvarpsstöðin leikstjóranum þróunarstyrk vegna verkefnisins en síðar meir ákvað Baltasar að ganga frekar til liðs við RÚV og Netflix. Heimildir Mannlífs herma að Stöð 2 hafi hótað leikstjóranum málsókn en hvorki Þórhallur né Baltasar vilja staðfesta að svo hafi verið.
„Þetta er afgreitt mál og allir sáttir. Til þess að geta haldið áfram með það sem við erum að gera þurfti að gera nýtt samkomulag og það tók smátíma að leysa úr því,“ segir Baltasar. Aðspurður um hvort honum hafi verið hótað málsókn segir hann að aðrir verði að svara fyrir það. „Ég greiddi þeim til baka það sem þeir settu í þetta og með smávegis álagi.“