Í fyrramálið, miðvikudaginn 11. mars, verður ákvörðun peningastefnunefndar Seðlabanka Íslands birt á vef bankans. Klukkan 10:00 hefst þá vefútsending þar sem Ásgeir Jónsson, seðlabankastjóri og formaður peningastefnunefndar, og Rannveig Sigurðardóttir, aðstoðarseðlabankastjóri og nefndarmaður í peningastefnunefnd, gera grein fyrir ákvörðun nefndarinnar.
Til stóð að birta vaxtaákvörðun marsmánaðar þann 18. mars en vaxtaákvörðun hefur verið flýtt vegna útbreiðslu COVID-19.
Mannlíf greindi frá því um helgina að Seðlabankinn og ríkisstjórnin væru á lokametrunum að undirbúa stóran aðgerðarpakka til að bregast við þeim áhrifum sem COVID-19 kann að hafa á efnahagsmálin og að Seðlabankinn myndi ekki bíða til næsta vaxtaákvörðunardags með að kynna ákvarðanir sínar.
Sjá einnig: Stór aðgerðapakki stjórnvalda vegna COVID-19 á lokametrunum
Á meðal þess sem verið er að undirbúa er lækkun vaxta, en Ásgeir Jónsson seðlabankastjóri lét í vikunni í veðri vaka að bankinn myndi bregðast við aðstæðunum. „Það liggur fyrir að ef það verður mikill samdráttur í landsframleiðslu þá mun það kalla á það að við reynum að örva hagkerfið með peningastefnunni, svo sem með því að lækka vexti en líka eftir öðrum leiðum,“ sagði Ásgeir á opnum fundi á Hilton hóteli í vikunni. Fordæmi eru þegar komin fram fyrir lækkun vaxta vegna kórónaveirunnar. Þannig lækkaði seðlabanki Bandaríkjanna óvænt vexti á þriðjudag, vegna óvissunnar sem uppi er eins og fram kom í umfjöllun Mannlífs um helgina.
Samkvæmt heimildum Mannlífs er vaxtalækkun í farvatninu en einnig er verið að skoða hvort minnka eigi bindiskyldu og létta á eiginfjárkröfu á hendur bönkunum, til að gera þeim kleift að lána til fyrirtækja og tryggja lausafé. Bindiskylda er eitt af stjórntækjum Seðlabanka til að hafa stjórn á magni lausafjár í umferð. Bankinn setur þær kvaðir á lánastofnanir að þær hafi ákveðið hlutfall af innlánum á reikningi hjá Seðlabankanum. Það er til þess fallið að draga úr getu banka til útlána.
Allar áætlanir endurskoðaðar
Katrín Jakobsdóttir, forsætisráðherra, Bjarni Benediktsson, fjármála- og efnahagsráðherra og Sigurður Ingi Jóhannsson samgöngu– og sveitarstjórnarráðherra, kynntu fyrr í dag áætlanir ríkisstjórnarinnar til að bregðast við þeim áhrifum sem COVID-19 mun hafa á efnahagsmálin.
Katrín byrjaði á að minna á að ríkisstjórnin sjái nú fram á að þurfa að endurskoða allar sínar áætlanir vegna útbreiðslu veirunnar.
Bjarni tók undir og sagði að forsendur fjármálastefnu og áætlana sem hafa verið gerðar séu nú brostnar. Þess vegna þurfti að koma með nýja áætlun. Hann segir að ný áætlun verði kynnt á næstu mánuðum, líklegast um miðjan maí.
Bjarni segir nauðsynlegt að bregðast við fyrirséðri niðursveiflu og aðstoða þau fyrirtæki sem munu lenda tímabundið í vanda, m.a. með því að opna á það að fyrirtæki fái frest til að standa skil á sköttum og gjöldum.
Sjá einnig: „Óvissan er mikil“