„Að sinna öryggiseftirliti á alþjóðaflugvelli finnst mér skipta máli. Að sjá mann með uppþvottabursta í stað hljóðnema dálítið fyndið en ekki móðgun,” tísti Bjarni Benediktsson, fjármála- og efnahagsráðherra. Tilefnið er þvottaburstinn sem birtist í mynd þegar tekið var viðtal við landsliðsfyrirliðann Emre Belözoglu.
Í viðtali við Belözoglu, sem TRT Spor birti á Twitter, sést ónefndur aðili rétta út þvottabursta í stað hljóðnema. Stuðningsmenn Tyrkja eru ekki par sáttir við uppátækið og sumir þeirra fullyrt að um klósettbursta sé að ræða. Þeir líta á gjörningin sem gríðarlega móðgun við fyrirliðann og þjóðina. Þá hafa margir skilið eftir athugasemd á Facebook-færslu KSÍ.
Sjá einnig: Utanríkisráðerra Tyrklands afar ósáttur við Íslendinga
„Ég reiðist ekki þegar erlent tungumál er þýtt á ensku í stað íslensku,” skrifar Bjarni og endar svo tístið á léttum nótum; „Fótbolti snýst um gleði og skemmtun. Áfram Ísland!”
Leikmenn Tyrkneska landsliðsins biðu í þrjár klukkustundir áður en þeir komust að vegabréfaeftirlitinu. Þá var gerð ítarleg leit í farangrinum þeirra. Landsleikur milli Tyrklands og Íslands fer fram á morgun, 11. Júní, á Laugardalsvelli.