Björgvin Leó Beck, sem er átta ára og búsettur á Þórshöfn, er einn af þeim sem ætlar að hlýða Víði og ferðast heima um páskana.
„Ég var að taka rannsóknarönn í Noregi, en 12. mars lokuðu skólar þar og við tókum snögga ákvörðun um að flýja heim, lentum daginn eftir og keyrðum heim á Þórshöfn í sóttkví,“ segir Gréta Bergrún Jóhannesdóttir móðir hans í samtali við Mannlíf.
Björgvin Leó varð átta ára 20. mars, og hélt upp á afmælið með móður sinni og bróður í sóttkvínni.
„Þessi snillingur hlýðir Víði, hann ætlaði að gera myndband fyrir Landann sem hann er dyggur aðdáandi að, en þegar búið var að klippa allt saman sá ég að auðvitað sneri ég upptökunni akkúrat eins og átti ekki að gera, en hann stefnir hvort sem er á að vera Jútúbari, ef áætlanir um fótboltalandsliðið skyldu klikka þannig að það kemur ekki að sök,“ segir Gréta á Facebook.:) #éghlýðivíði
„Við ætluðum að vera í Bergen um páskana,“ segir Gréta, en fjölskyldan fór út í lok desember. „Við ætluðum að vera í Þrándheimi fram í júní, þeir í norskum grunnskóla og ég að taka hluta af doktorsnáminu mínu.“