Björn Logi Þórarinsson, sérfræðilæknir á Landspítalanum, hefur verið sendur í leyfi frá spítalanum vegna ásakana um kynferðislega áreitni gagnvart nokkrum samstarfskvenna hans. Er hann meðal annars sagður hafa sent nektarmynd af sér. Því harðneitar hann.
Mannlíf fjallaði fyrst fjölmiðla um meint brot hans gegn konu á Umdæmissjúkrahúsi Austurlands í Neskaupsstað. Í því samtali harðneitaði Björn Logi að hafa sent nektarmynd á „nokkra aðila.“
„Í fyrsta lagi á ég enga gæru,“ sagði Björn Logi þegar blaðamaður Mannlífs spurði hann út í myndina sem virðist vera til en á henni ku Björn liggja alls nakinn á gæruskinni. Segir hann ennfremur í samtalinu að ef það er til einhver mynd af honum nöktum sem hann hefur sent á konu einhverntíman í samtali, sé komin í dreifingu sé það mjög miður og í raun lögbrot.
Á Stundinni í dag stígur fram eitt fórnarlamba Björns Loga og lýsir alvarlegum afleiðingum þess að hafa orðið fyrir áreitninni af höndum læknisins. Tilkynnti konan Björn Loga formlega í febrúar á þessu ári vegna áreitni sem hafði þá staðið yfir frá því hún var læknanemi. Viðurkenndu stjórnendur spítalans í samtali við Stundina að þeir hefðu brugðist konunni því hvorki var Birni Loga veitt áminning né var hann sendur í leyfi á meðan málið var kannað. „Það kom fyrir að það leið yfir mig í vinnunni og ég grét mikið á kvöldin yfir því að þurfa fara í vinnuna daginn eftir,“ segir hún í Stundinni.
Þegar konan var læknanemi fékk hún að heyra setningar frá lækninum á borð við „Ég veit nákvæmlega hvaða herbergi í Fossvogi ég myndi nota til að ríða þér,“ en einnig hafi hann sent henni nektarmynd á Snapchat og spurt hana hvort hana langaði ekki að sofa hjá sérfræðingi.
Sjá einnig: Læknir á Landpítalanum sendur í frí vegna óviðeigandi hegðunar: „Ég sagði brandara og var með grín“