Goðsögnin og Nóbelsverðlaunahafinn Bob Dylan kom aðdáendum sínum rækilega á óvart í nótt þegar hann póstaði glænýju frumsömdu lagi á Twitter-prófílinn sinn. Lagið heitir Murder Most Foul og er sautján mínútna löng ballaða þar sem textinn fjallar um morðið á John F. Kennedy bandaríkjaforseta í Dallas í nóvember 1963 og hnignun Bandaríkjanna síðan þá.
Dylan lýsir í textanum morðinu á Kennedy í sterkum orðum, talar um hann sem fórnarlamb leitt til slátrunar og segir að hann hafi verið skotinn eins og hund um hábjartan dag. Hann talar um tónlistina sem eina ljós Bandaríkjanna í því myrkri sem morðinu hafi fylgt og í textanum er vísað til Bítlanna, Woodstock-hátíðarinnar, Charlie Parker, Eagles og Stevie Nicks, svo eitthvað sé nefnt.
Í skilaboðunum sem fylgdu laginu á Twitter vísar Dylan undir rós til kórónaveirufaraldursins, þakkar aðdáendum sínum fyrir stuðning og tryggð í gegnum árin og klikkir út með að segja: „Þetta er óútgefið lag sem við tókum upp fyrir töluverðu síðan sem þið gætuð haft áhuga á. Verið örugg, verið árvökul og megi Guð fylgja ykkur.“
Greetings to my fans and followers with gratitude for all your support and loyalty across the years.
This is an unreleased song we recorded a while back that you might find interesting.
Stay safe, stay observant and may God be with you.
Bob Dylanhttps://t.co/uJnE4X64Bb— Bob Dylan (@bobdylan) March 27, 2020
Dylan hlaut eins og kunnugt er Nóbelsverðlaunin í bókmenntum árið 2016, fyrstur dægurlagatextahöfunda en hann gaf síðast út frumsamda tónlist á plötunni Tempest árið 2012.