Eftirfarandi auglýsing birtist í Bændablaðinu í gær:
Borgardrengur leitar að kvonfangi. Vel ættaður, rauðbirkinn drengur á fertugsaldri. Verður aðgengilegur á Eyjafjarðarsvæðinu. Hann er einkar vænlegur til undaneldis, með afbragðs vilja, óvenju framfallegur og hreyfingagóður. Áhugsamir geri vart við sig á ættarmóti í Funaborg aðra helgina í júlí.
Sá sem hér er auglýstur er enginn annar en tónlistarmaðurinn og framleiðandinn Egill Viðarsson en hann heldur úti hljóðverinu Stúdíó Harmur, ein aðal sprauta hljómsveitarinnar Andy Svarthol og gítarleikari Q4U.
Svo virðist sem hann hafi þó ekki sjálfur staðið að birtingunni en á Facebook síðu sinni opinberar hann að „Ég er að fara á ættarmót fyrir norðan. Frændum mínum og bróður er mikið í mun að finna mér kvonfang og leita til þess ýmissa leiða.“
Egill er ekki bara þekktur sem hæfileikaríkur tónlistarmaður og húmoristi því mynd af honum eftir sólbað hlaut heimsathygli fyrir nokkrum árum.
Egill tjáði blaðamanni að áhugasamir sem hyggjast vitja hans á ættarmótinu geti hæglega borið kennsl á hann þar sem hann verði í grænbrúnni skyrtu og hann verði með hár eins og gaddavír.